Հայաստանի հավաքականի գլխավոր մարզիչ Խոակին Կապառոսը հարցազրույց է տվել Radio Marca-ին, որում խոսել է Հայաստանում անցկացրած իր առաջին օրերի մասին: «Օրեր առաջ գնացի Հայաստան, ՀՖՖ նախագահն ինձ հրաշալի ընդունեց, պայմանագիր կնքեցինք: Շփվեցինք ֆեդերացիայի բոլոր աշխատակիցների հետ, տեսանյութեր դիտեցի հավաքականի մասին, ծանոթացա Հայաստանի հավաքականի ենթակառուցվածքներին: Մեզ համար մեծ առավելություն է, որ ՀՖՖ տեխնիկական տնօրենը Խինես Մելենդեսն է: Մենք նույնիսկ ծրագրել էինք ներկա գտնվել Հայաստանի առաջնության որոշ խաղերի, , բայց եկավ այդ չարաբաստիկ կորոնավիրուսը և խառնեց մեր ծրագրերը, առաջնությունն էլ դադարեց: 2 հագեցած օր ունեցա Երևանում, որտեղ դեռ ամեն ինչ այդքան էլ վատ չէր. որքան հիշում եմ՝ այդ օրերին դեռ մոտ 30 վարակված մարդիկ կային, ռեստորաններն ու սրճարանները բաց էին, ես զբոսնում էի փողոցներով, որոնք շատ ակտիվ էին ու ինձ դուր եկան: Բայց Հայաստանում էլ արտակարգ դրություն հայտարարվեց, փակվեցին դպրոցներն ու հաստատությունները՝ այդ թվում նաև ֆեդերացիան, իսկ մենք ստիպված ենք աշխատել տանից՝ համակարգչով: Ես ճիշտ եմ համարում ՈւԵՖԱ-ի՝ ԵՎՐՈ 2020-ը հետաձգելու որոշումը: Կան բաներ, որոնք վեր են սպորտից ու ֆուտբոլից: Գլխավորը մարդկանց առողջությունն է, ու ես վստահ եմ, որ մենք կհաղթահարենք այս դժվարին ժամանակահատվածը», – նշել է Կապառոսը: