ՀՀ պաշտպանության նախարարությունը հայտարարել է Վ. Սարգսյանի անվան ռազմական համալսարանի հիմնի խոսքերի մրցույթ` անվճար հիմունքներով: Երաժշտությունը նվիրելու է կոմպոզիտոր Ռոբերտ Ամիրխանյանը, իսկ ստեղծագործողներն իրենց գործերը կարող են ուղարկել մինչեւ օգոստոսի 1-ը: Ռոբերտ Ամիրխանյանը մեզ հետ զրույցում նշում է` վերջերս ներկա է եղել մի հանդիպման եւ տեսել է, թե ինչ թափ է ստանում ուսումնական կենտրոնը. «Եվ մեծ սիրով առաջարկեցի, որ պատրաստ եմ գրել համալսարանի հիմներգը, եւ իրենք հանձն առան մրցույթ հայտարարելու: Սա մեր այսօրվա կորոնյան վարակի ծանրագույն օրերի հակադարձ կողմն է, որ մենք, այնուամենայնիվ, ստեղծագործությամբ փորձում ենք լցնել այս ժամանակը: Բառերը կտան ինձ, եւ ես էլ մեծ սիրով ու ոգեւորությամբ կգրեմ երաժշտությունը: Երգը շատ լուրջ բան է եւ նշանակում է խոսքի, գաղափարի եւ երաժշտության միասնություն: Այդ հիմնը պետք է իրենց խորհրդանիշը լինի, որի մեջ պետք է խոսեն իրենց կեցվածքի, երազների, անելիքների ու առաքելության մասին, եւ երաժշտությունն էլ պետք է գա ամրացնի այդ բովանդակությունը»: Սա, փաստորեն, նվե՞ր է իր կողմից ռազմական համալսարանին։ «Ջանիկս, ուրիշ ձեւ չի կարող լինել, երաժշտությունը եւ արվեստը վեր են բոլոր շուկայական պայմաններից»: