Քաղաքագետ Աղասի Ենոքյանը ֆեյսբուքյան իր էջում գրել է. «Կորոնավիրուսի դեմ պայքարի շրջանակում Հայաստանում սահմանվեց կարանտին։ Մարդիկ տներից դուրս չէին գալիս։ Աշխարհի շատ երկրներում է այդպես։ Մարդկանց տրամադրվում է հնարավորություն սովահար չլինելու, կենսաապահովման նվազագույնն ապահովելու համար։ Կարանտին հայտարարած երկրների մեծ մասում այդպես է՝ կառավարությունն օգնում է։ Բնակչությունը դժգոհում է։
Բայց մեր երկրում բնակչությանը գոյատևելու հնարավորություն տրված չէր, դրա համար էլ չեղարկեցին կարանտինը։ Մարդիկ գոհ են իշխանությունից, որ չթողեց, որ իրենք սոված մեռնեն։ Հին պատմություն կա այն մասին, թե երբ մարդը հանում է 3 համար փոքր կոշիկը, որքան երջանիկ է դառնում։
Փաստորեն, Հայաստանում կարանտինը ոչ թե համաճարակի դեմ պայքարի համար էր, այլ ապրելու շատ վատ պայմաններ ստեղծելու համար, որից հետո, երբ մոլեգնող կորոնավիրուսի պայմաններում հնարավորություն տրվի սովամահ չլինելու, մարդիկ դառնան շատ գոհ ու օրհնեն իշխանությանը։
Փայլուն մանիպուլյացիա է, բայց կա կարևոր մի նկատառում։ Համաճարակը թափ է հավաքում, արդեն ունենք հազարավոր հիվանդներ, օրական 100-ից ավելի նոր հիվանդ, տասնյակ մահվան դեպքեր։ Որոշ ժամանակ անց կարող է այնպիսի իրավիճակ ստեղծվել, որ մեծաքանակ հիվանդների պատճառով պարզապես շատ բիզնեսներ փակվեն ու տնտեսությունը կանգ առնի։ Այն ժամանակ սկսելու ենք շատ ավելի մեծ ծախսեր անել վերականգնելու համար և շատ ավելի սովահարներ ու շատ ավելի մահեր կունենանք»։
