«Մինչև մայիսի վերջ ԵՄ ավիացիոն անվտանգության գործակալությունը պետք է որոշում կայացնի՝ ներառե՞լ Հայաստանի քաղավիացիայի կոմիտեն «սև ցուցակի» մեջ, թե՞ ոչ. դա ենթադրում է, որ եվրոպական այդ կառույցն անբավարար է գնահատում մեր ավիացիոն իշխանության աշխատանքը»,- «Արմնյուզ» հեռուստաընկերության եթերում ասել է ավիացիոն ոլորտի կառավարիչ, վարչապետի նախկին խորհրդական Հակոբ Ճաղարյանը:
Նրա խոսքով՝ հայկական երկու ավիաընկերություններ զրկված են եվրոպական հավաստագրից, քանի որ Հայաստանը՝ որպես շահագործող երկիր, ի վիճակի չէ միջազգային նորմերին համապատասխան՝ ապահովել օդանավերի թռիչքային պիտանելիության հավաստագրումը և թռիչքային անվտանգության վերահսկումը: Ըստ Ճաղարյանի՝ պատճառը քաղավիացիայի կոմիտեն է, ոչ թե՝ այդ ընկերությունները:
Ճաղարյանի խոսքով՝ մեր ավիացիոն իշխանությունները հատել են կարմիր գիծը, որևէ հնարավորություն չունեն որպես գործընկեր դիտարկվելու ԵՄ-ի ավիացիոն գործակալության կողմից և կներառվեն «սև ցուցակի» մեջ. «Մենք պետք է հարցը տեխնիկական դաշտից տեղափոխենք քաղաքական հարթություն: Եթե ՀՀ կառավարությունը Եվրամիությանը դիմի խնդրանքով, «սև ցուցակում» ներառվելը կարող է հետաձգվել: Իշխանությունը պարտավոր է անել ամեն ինչ՝ բազմազանեցնելու դեպի Եվրոպա թռիչքների աշխարհագրությունը, ու ցավալի է, որ փոխվարչապետ Ավինյանն ասում է, թե մեր ավիաընկերությունները չեն թռչում Եվրոպա»,- ասել է Ճաղարյանը:
Մանրամասները՝ տեսանյութում:
