Հայաստանում բրոքերները պանդեմիայի ֆոնին կանխատեսում են անշարժ գույքի վաճառքի եւ վարձակալության գների աճ: Շուկայում աժիոտաժ է, եւ գնիջեցում չի նկատվում: Այս մասին NEWS.am-ի հետ զրույցում ասաց «Best House» ընկերության բրոքեր Լեւոն Հակոբյանը: Նա նշեց, որ այս տարի անշարժ գույքի գինը նույնիսկ կարող է աճել, եթե, իհարկե, բացվեն ցամաքային սահմանները: Իսկ տների ու բնակարանների վարձակալության գները, նրա խոսքով, նվազել են միջինում 20 տոկոսով, ընդ որում, դա վերաբերում է թե օրավարձին, թե ամսական վարձին, սակայն այժմ գների աճի միտում է նկատվում, եւ հնարավոր է, որ հենց 20 տոկոսով գները կբարձրանան: «Անկումը կապված է տուրիզմի ոլորտում ճգնաժամի հետ: Ինչ վերաբերում է կոմերցիոն անշարժ գույքին, ապա վարձակալության գներն այդ սեգմենտում եւս նվազել են 20 տոկոսով՝ կրկին զբոսաշրջիկների բացակայության պատճառով»,-նշեց Հակոբյանը: «Trust Realty» ընկերության բրոքեր Վահե Սահակյանը NEWS.am-ի հետ զրույցում հայտնեց, որ վաճառքի գները ինչ-որ պահի նվազել են 5-10 տոկոսով, ապա՝ բարձրացել: «Կոմերցիոն անշարժ գույքի գները մնացել են նույն մակարդակին, իսկ այդ սեգմենտում գործարքները հիմնականում իրականացնում են անմիջապես վարձակալներն ու տանտերերը փոխադարձ զիջումների հիման վրա»,-հավելեց նա: Բրոքերը պարզաբանեց, որ հնարավոր փոփոխությունները պայմանավորված են ցամաքային սահմանների բացման ժամկետների հետ եւ նրա հետ, թե երկրում խիստ կարանտինի կհայտարարվի, թե՝ ոչ: «Եթե մոտ ժամանակներս բացվեն սահմաններն ու կարանտին չմտցվի, ապա կարելի է ակնկալել գնաճ 5-10 տոկոսի սահմաններում: Մուտքի եւ ելքի ինտենսիվացումը, անկասկած, կհանգեցնի պահանջարկի մեծացմանը»,-եզրափակեց նա: Նշենք, որ համաձայն պաշտոնական վիճակագրության՝ այս տարվա առաջին կիսամյակում հանրապետությունում իրականացված ընդհանուր գործարքների թիվը նվազել է 15%-ով՝ կազմելով 71516 գործարք, ընդ որում՝ անշարժ գույքի առուվաճառքի գործարքները նվազել են 12.1%-ով՝ կազմելով 19979: Օրինակ՝ Երեւան քաղաքում այս տարվա առաջին կիսամյակում 2019թ.-ի առաջին կիսամյակի համեմատ առուվաճառքի գործարքների թիվը նվազել է ավելի քան 27%-ով, մարզերի քաղաքային բնակավայրերում՝ 10.5%-ով, իսկ գյուղական բնակավայրերում արձանագրվել է թեեւ աննշան, բայց 1.2% աճ: Երեւանում բազմաբնակարան բնակելի շենքերի բնակարանների 1 քմ շուկայական միջին գինը աճել է շուրջ 17.8%-ով: