Գ. Ծառուկյանի պաշտպան Երեմ Սարգսյանը ներկայացրեց դատավոր Մնացական Մարտիրոսյանին ինքնաբացարկ հայտնելու միջնորդության հիմքերը: «Տեղեկություններ ենք ստացել, որ ինչ-որ պաշտոնյաների միջամտությունների արդյունքում նախապես որոշում է կայացվել, որ Վճռաբեկ բողոքները պետք է հնարավորինս արագ մերժվեն ու ժամկետները համապատասխանեն Կենտրոն նստավայրի հերթապահությանը:
Որոշված էր, որ գործը պետք է այս օրը մուտքագրվի ու հենց Մարտիրոսյանին հանձնարարվի... Հրատապության կարիք ունեն ու անում են, քանի որ քաղաքական գործընթացներ են ընթանում՝ Ծառուկյանը հանդիպումների մեջ է, ակտիվ է, հանրահավաք է նախանշված և այլն, դրա համար ուզում են հնարավորինս շուտ կալանավորել Գագիկ Ծառուկյանին»: Հարցին՝ պաշտոնատար ո՞ր անձի մասին է խոսքը, ասաց. «Չեմ կարող պաշտոնատար անձի անուն տալ, սխալ կլինի: Մենք բավականին խորը տեղեկատվություն ունենք ու համապատասխան մարմինները կարող են պարզել: Մի անձ չի, անձինք են.....»:
